L'histoire du Canada

Extrait: ...par ainsi le Soleil est pres de sept mille fois plus grand que la Lune. Et par opinion on tient aussi que le Soleil estant monte au plus haut point est dix huict fois plus loin de la terre que la Lune. Et pour le comble de son honneur on l'appelle le Roy des estoilles fixes & errantes, estant le plus grand de tous les corps celestes le plus lumineux & chaleureux sans comparaison, & apres cela je n'ay plus de louange a luy donner, sinon qu'il est la figure & l'ombre de nostre vray Soleil de justice, Jesus qui faict du bien aux bons & aux mauvais, sans distinction du fidel ou de l'infidel, mais bien heureux celuy qui a tousjours son coeur & sa pensee en luy. De la creance & vaines opinions des Montagnais de diverses deitez. De la creation du monde, & du flux & reflux de la mer. CHAPITRE XXXI. J E pensois au commencement ne faire qu'un Chapitre de la creance des Hurons & de celle des Montagnais, mais comme je l'ay veu grossir sous ma plume au dela de mon dessein j'ay brize au milieu de la carriere & faict d'un grand Chapitre deux petits, afin que l'on puisse mieux comprendre ce que je dis, car la multitude de la matiere offusque l'esprit & empesche l'entendement de la bien concevoir, & partant l'on ne trouvera point mauvais si quelqu'uns de mes Chapitres sont abregez, plus faute de Rhetorique que de matiere, o qu'il y a de personnes riches en parolles & en eloquence, qui diroient des merveilles ou je me trouve muet, c'est mon imperfection & mon deffaut d'estude. J'avois autrefois appris plusieurs petits contes fabuleux, touchant la Creation du monde & le deluge universel, que tiennent nos Hurons, lesquels me sont eschappez de la memoire, & de ma plume peur de me meprendre, mais je diray avec plus d'asseurance ce peu que j'en ay sceu de nos Montagnais, pour en avoir eu la memoire rafraichie en discourant avec nos freres. Mais au prealable, il faut que je vous die de nos...